Invati Exfoliating Shampoo
頭皮淨化洗髮水

我係Aveda支持者，所以就算呢個系列超貴，都買左枝細既洗頭水同埋護髮素試用。我好鍾意佢既自然香味，好舒緩，令人好放鬆，所以每日放工返到屋企，最期待就係用佢洗頭啦！洗頭水質地都幾稀，所以要小心，太用力按個樽的話，會倒出太多洗頭水造成浪費。佢起泡唔多，但網頁指佢既成份有水楊酸，所以泡量雖少仍可有效清潔頭皮。過水後頭髮摸落好鞋，我用埋同系列護髮素，覺得兩者真係絕配！呢條line係針對頭皮的，所以護髮素可以搽埋落頭皮做按摩。我搽完護髮素就沖涼洗面，等三分鐘後先過水，過水後頭髮好滑。吹乾頭後，頭髮非常有光澤！我有敏感頭皮，普通護髮素掂到頭皮的話一定起頭瘡，但我用左Invati有三星期，差不多日日用佢，我頭皮唔單止冇敏感／痕癢／起頭瘡，仲好舒爽同埋少左好多頭皮屑！冇記錯的話，佢應該係Aveda最貴既一條line,但我覺得對敏感頭皮黎講，佢真係救星，而且用完佢，我既頭髮最有光澤，就算係貴價既Kerastase洗頭水都做唔到呢個效果！所以用晒細枝裝，我會買１Ｌ的洗頭水及護髮素。我情願慳錢唔買化妝品，買少Ｄ衫或鞋，都要用Aveda。始終相信女人只要膚質好，髮質好，心地好，個人就會精神爽利同埋有自信。