一見到Clinique出新嘅美白精華已經好想試，今次有機會試用真係好幸運❤️

首先我自己皮膚係混合乾肌，臉頰容易脫皮（尤其係呢排戴口罩成日摩擦），T字位微微出油，有痘印同膚色不均問題，有時夜訓/特別攰嘅話臉色會暗黃。

呢枝精華嘅質地一擠出嚟係有少少流動性嘅半透明乳液，推開之後好快吸收，然後變成清爽輕微帶matte感嘅狀態。

我第一次用嘅時候喺塊臉邊緣嘅地方打圈按摩得太耐，結果有輕微搓泥嘅情況。所以我建議從臉的中心開始搽，可以先打圈令精華填入毛孔，跟住順方向輕輕推開。之後幾日我就冇再遇到搓泥嘅問題，皮膚吸收得好好，再搽防曬都ok。

最令我驚喜嘅地方係佢嘅補濕度同改善皮膚質感嘅能力，冇諗過一支美白精華可以有咁全面嘅效果? 對比使用前後，只係連續早晚用咗五日已經見到皮膚光澤度同平滑度有提升✨ 雖然咁短時間未見到痘印即時減淡，但係整體提亮嘅效果明顯，相信持續用就會改善到色素嘅問題！而且保濕度比一般美白精華高，基本上搽完佢之後加薄薄一層乳液就夠，仲冇令我出現任何暗粒粉刺。

我本身唔太鍾意質地偏濃稠嘅精華，一直用開嘅都係比較水狀，但係今次呢枝真係好有驚喜！有補濕度但係唔笠唔焗皮膚，就算搽喺甩皮嘅地方都冇刺激感，感覺好安心！好期待繼續用嘅效果❤️