收到產品之後，我就要去高等法院「返工」，因為被抽中咗要做陪審員。不過嗰排日日都要非常專注去聽審，又要諗清楚疑犯有罪定冇罪。責任重大，所以我都冇精神心機時間專心立刻去試產品。


幸好，截止交報告前一星期就「卸任」啦（還好不是大 case）！咁我就嗱嗱聲去試呢支 Dermastir 維他命 C 安瓶精華啦！


返高院嗰段時間，咁啱天氣乾到爆，連續幾日最低相對濕度得嗰 35%。再加上嗰度所到之處嘅冷氣都好給力！當然唔少得嘅，就係本身年紀越嚟越大，皮膚都自然會越嚟越乾。喺種種嘅因素底下，我都幾期待想知 Dermastir 幫唔幫到我手對抗乾燥。


之前睇過一本醫生寫嘅書，話護膚用維他命 C 基本上係一定冇錯。我其實都試過 3 隻唔同牌子嘅維他命 C 精華，佢哋嘅質地都偏厚同黏「立」啲嘅。


早排咁熱，用 S 字頭嗰隻維他命 C 精華，流出嚟啲汗係黃色，真係嚇死我！可能唔吸收，又或者係份量用多咗嘅問題？我唔清楚。我唯一清楚嘅係，我用親呢隻，皮膚都覺得會乸。


Dermastir 呢隻淡黃色，質地唔厚，幾清爽。基本上一放上面就立即吸收晒，你推慢少少就推唔到㗎啦！一次份量，面頸，1/4，再多都會立立哋。


第一次用完（星期六朝）右下下爬位即時起咗粒瘡。皮膚一向都偏敏感，轉親護膚品都有機會有不適。加上咁乾燥嘅天氣，皮膚狀態咁弱嘅情況底下，唔出奇。不過呢，夜晚沖完涼護膚前，呢粒瘡雖然都仲喺度，但就已經冇朝早嗰時咁紅、咁腫。


星期六冇出街都特登化個妝試吓。上妝已經 feel 到塊面冇咁乾，個妝貼咗好多。另外，目測鼻頭啲毛孔、額頭啲細紋都有改善到。好正，只係用咗兩次 Dermastir 咋！


到星期日朝早，洗完面搽護膚品前，發覺嗰粒敏感瘡已經冇咗！確實係敏感反應無誤，不過就唔係對 Dermastir 嘅成份敏感。因為已經連續用咗兩次，之後都冇其他敏感情況出現。相信係嗰個位特別乾，反映平時護膚忽略咗佢；呢啲事其實都唔係第一次發生，所以我都識分係對成份敏感，定還是乾燥引致嘅敏感。


我用咗 5 次就用晒一支精華（佢有分 intensive 定 normal treatment 嘅用法。我呢啲一定係 intensive 無疑。正常用到 6 次，早晚各一次，證明我有幾乾！）。第一日塊面實在太乾，所以用嘅份量多咗。到第三日，我發現除咗用量少咗，但塊面都夠晒滋潤之外，我仲發現咗佢吸收得冇第一日快得咁誇張。


我意思唔係佢唔吸收。我會覺得之前塊面乾到佢係咁吸啲精華，所以我用量多，又會一搽上面唔快啲推就會冇晒。證明呢幾日搽嘅精華，佢真係有效地幫我保濕。


據我自己目測，膚色均勻咗，白淨咗，毛孔細緻咗，上妝個妝貼咗，塊面冇三日前咁浮腫。


啲斑就咁望落唔覺有咩變化，但化完妝就知啲斑其實係有淡咗。因為平時上完粉底，係需要用遮瑕膏，佢先冇咁覺眼。星期日冇用遮瑕膏，啲斑要好細心先會被察覺到。用咗三日、1 支精華就有咁大改變，用晒呢 5 支我真係覺得，人生再次見到曙光！呢支維他命 C，亦順利成為咗我呢一刻最喜愛嘅維他命 C 產品！


Dermastir 呢個安瓶樽算容易整得開，之前試過一隻厚得滯搞咗好耐，我都開唔到！另外，我係就咁倒啲精華出嚟用，用完先蓋返嗰個塑膠蓋；蓋住倒，根本係倒唔到出嚟嘅。唔影響產品效果嘅，我冇所謂。


最後提提大家，開呢支精華用之前，記住搖勻咗先開嚟用呀！