年踏 40，我經常都喺度諗，係咪人到中年就一定要用啲下下過千嘅護膚品先得？所以我致力、不斷咁搵啲性價比高嘅產品，幫我同歲月去抗衡。

Bioderma 嘅再生水就係我喺上一次嘅試用入邊，搵到嘅性價比高嘅產品之一啦！今次試用嘅 Bicelle 同屬 Neo Derm 集團嘅產品，我對佢哋係有一定嘅信心！因為用過 NeoStrata、Obagi 同 Bioderma 嘅護膚品，所以喺我嘅心目中，Neo Derm 已經等同於質素同信心嘅保證！

同埋我第一件用過嘅 Bicelle 產品係佢嘅 3D 抗氧補濕面膜，效果令我十分滿意，亦一直都 keep 住買嚟用至今。今次有得試埋另外嘅三款產品，真係我心感興奮！

講返今次嘅試用品，我最期待就係全效維他命C護眼精華啦！因為今年開始，我對眼個眼袋忽然間變得好顯眼，望落真係又顯老又憔悴。瞓得好足，個眼袋都與我常在。當然，唔夠瞓個情況會更加差啦！

去一去相，試用咗只係十一日，我個眼袋已經變得唔顯眼！真係好正！呢隻眼精華淨係日頭用，質地睇落似油，其實係水狀嘅，所以好適合最怕「痴立立」嘅我用！用量呢，我係用一滴已經夠兩邊眼用㗎啦！如果天氣乾燥或者覺得就咁用唔夠滋潤嘅話，就加一滴落眼霜，咁就一年四季無論任何天氣都啱用。呢隻眼精華就係今次嘅試用入面，我覺得性價比高，又好值得投資嘅護膚品之一！一日先用一滴，一樽有成 15ml，都唔知何年何月先用得晒呀 ? 如果一年先買一兩樽，就 keep 到我個眼袋唔蒲頭，我覺得係完全值得投資嘅項目啦！

另外試用嘅有日頭用、適合中/油性肌膚嘅全效維他命 ACE 精華，同埋早晚用、適合任何膚質嘅皇牌產品全效維他命 B5 補濕精華。試用嘅呢十一日，我就日用 ACE，夜用 B5，咁就全日都畀維他命 A、B、C、E 保護住我啲皮膚啦 ?

效果如何？又係睇相嘅時候啦！望落啲皮膚好水潤飽滿，同用之前嗰種乾爭爭真係有睇得出嘅分別！雖然呢排日日濕度都過 80% 咁潮濕，但我洗完面都會即刻覺得塊面好乾，會有拉扯嘅感覺。用咗呢兩支精華之後，呢個面乾嘅情況就得到咗改善。

論減紋嘅效果，睇吓條頸，效果都實在係太顯著啦！真係好滿意個效果！

至於淡斑效果，雖然只係用咗十一日，但都見到真係有淡咗喎啲斑！好神奇呀！

相片睇唔到嘅皮膚觸感，摸落好軟熟，亦都比之前有彈性咗好多！

兩隻精華比較，睇落會認為係 ACE 會油啲「立」啲。但事實係，我反而覺得 B5 「立」啲，不過都適合夏天用嘅，因為佢吸收得都幾快。


眼精華同 ACE 精華排第一嘅成份係 L-抗壞血酸，佢係水溶性嘅，所以用落真係水咁，唔係油立立㗎！L-抗壞血酸，簡單啲嚟理解，你可以叫佢做維他命C，係抗氧化嘅。

最後不得不提呢三隻護膚品都有嘅一種成份，就係積雪草。基本上我見啲護膚品有呢個成份，我都會買嚟用！佢幫到啲皮膚保濕同有彈性。雖然搽落唔會即刻就覺得好潤咁，但日日搽，日子有功，你會睇到啲皮膚每日都變好！今次都唔例外，同樣做到呢個效果！所以各位真係要認實呢個成份，係好嘢嚟㗎！

性價比高嘅抗衰老產品 list，又多三樣可以用啦 ?